غنوه فى اول الشارع

أنا معرفش إيه اللى خلانى أجيلك تانى؟...مش كنا

خلاص يا اميرتى ...شفتك النهارده الضهر على

الكورنيش و قولنا الكلام كله...إيه اللى خلانى أرجع و

أعدى عليكى قبل ما أسافر...و لما كنت نازل لبيتكم

اللى فى البدروم على السلم ...ليه وقفت فى

الضلمة؟...و إزاى حستى بيا و فتحتى الباب؟...مش

عارف...و دلوقت انت بقعدينى على الكنبة و بتصحى

أخوكى الصغير و تزقى رجله على جنب عشان أقعد...و

تلمى الهدوم المتبعترة فى كل حته...و تغيرى قناة

التلفزيون...علشان تفهمى من غير ما تسألى إيه اللى

جايبنى دلوقت بعد ما خلاص حسافر؟...بلاش ...هيه

مش امك جت و وقفت على باب الأوضة و لما

شافتنى..كانت عينيها بتصرخ " يا عالم...يا هوه...هو

إحنا مش حنخلص من الغلب ده بقى"...لكنها كانت

ساكته لما حطيت وشى فى الأرض...و دخلت المطبخ

تعمل الشاى...و أنت بتبصى فى عينيا و بتسألى ألف

سؤال وسؤال مستنية الأجابات...و بدل ما تسألنى

تسكتى و عيونك تنزل الأرض كأننا أول مرة بنشوف فيها بعض

إحنا ساكتين...لكن الغنوة اللى فى أول الشارع

ماسكتتش...لسه صداها فى الجو و فى الشارع

الهادى المضلم بيردد الألحان و النغمات...حد فاتح

الراديو على إذاعة الأغانى...و بيسمع أغنية قديمة
لعبد الوهاب

أخوكى الصغير بيصحى من نومته على كلامنا أو بالأصح

سكوتنا...أو على دوشة الشارع الرئيسى...أو من حر

الأوضة اللى تحت الأرض...بس بيقوم ويقعد يبصلنا

بإستغراب...ولا كاننا أغراب...و يقوم يدخل فى حضنى و

يكمل نومته على كتفى...و قبل ما يصحى...كنت

بتقولى أن خالتك قعدت تحط السم فى ودانك

وتقولك.."أول ما يسافر..ترمى دبتله..و شوفى نصيبك يا

بنتى"...لكن أنت سكتى...و أمك سكتت...لأنها فاهمة

و عارفة القصة والحكاية...عارفه أن لو أنت رميتى الدبلة

مش حتلاقى حد يتقدملك...مش عشان

النصيب..لأ..عشان أنت قولتى ربنا مابيرضاش بظلم

البنى آدم...و مابيرضاش على اللى يرفض نصيبه و قدره من الدنيا

خلاص..معدش فى غير الدموع يترجموا كلامك...و أنت

قومتى تغسلى وشك منهم و تبصى على نفسك فى

المراية الصغيرة المشروخة اللى فوق الحوض...و أمك

جابت لى الشاى وهى بتبصلى بصه...ماكنتش عارف

أفسرها...فيها من اللوم ،الشفقة ،الحب و الحنان

خلاص.. ماعدش فى كلام يتقال غير الكلمتين اللى

بتكرريهم.."حتقعد فين؟ ومع مين؟ وحتشتغل إيه

هناك؟"...أنا لسه فاكر أمى من أسبوع كانت بتسال

زيك..لكن حتعملى إيه؟...و أنت نفسك تقولى اللى فى

قلبك...بس مش عايزة تجرحينى قبل السفر...و أنا

مش عارف إيه اللى خلانى أوصيكى على أمى؟...رغم

أنها ماشفتنيش و أنا خارج من بيتنا...كانت قاعدة طول

الليل تحضر شنطتى و تستنانى أجى عشان تودعنى

لكن طول الأنتظار هدها و غلبها النوم...كنت عايز

أبوسها فى جيبنها...بس قولت بلاش...لأحسن

تصحى...و تشوفنى...و تعيط..وأنا ماكنتش ناقص

عياط..خرجت من غير ما تشوفنى ..ولا أنا أبوسها

وتبوسنى...اللى شافنى و أنا ماشى هو حسن

أخويا...الواد أول ماشافنى فى الشارع...جرى ودخل

فى حضنى...وماهموش الناس اللى كانت بتبص

علينا...و فى حضنى..و فى قميصى...بكا و

عيط...وشال عنى الشنطة رغم أنها كانت تقيلة

عليه...قولته "بلاش أحسن"...مرضيش و أصر على أنه

يوقف لى التاكس كمان و كان نفسه يركب معايا و يوصلنى لحد المطار

خلاص...أنا اللى بحكى وماعدش فى كلام يتقال...و ا

لغنوة اللى فى أول الشارع...سكتت بعد ما فرج بواب

الفيلا اللى ع الناصية قفل الراديو الصغير القديم...و إن

كانت الغنوة خلصت و سكتت فى راديو فرج

البواب..أهيه بتتعاد تانى وتالت فى التاكسى.. و فى

المحل اللى على تانى ناصية.. و فى القهوة..و فى

أوض النوم..لسه صداها فى الشارع...و فى

الشبابيك..وفى قلبى.. وفى قلبك

خلاص...أنا ماشى بقى...مش عشان معاد الطيارة

قرب...لأنى لو قعدت شوية كمان...مش حسافر
_________________

ههههههههههههههههههه مع انى مفهمتش اى حاااااااااااجه يا كاتى بس شكرا على الموضوع ده لو فى حد فهم بقا يبقى يفهمنى يا جماعه
_________________

موضوع حلو
بس انا كمان مفهمتش حاجه
اكيد فيها حاجه بس احنا مش عارفيناها يا باسم
عموما لو حد فهم حجه ممكن يقولهالنا
ولو مفيش حد يبقى كاتى اكيد هتشرحهالنا يا باسم
_________________
jesus my lord

بصوا دى قصه حب واحد كان مسافر عدا على حبيبتوا قبل مايسافر وده الحديث اللى كان بنهم بس هى قصه رومنسيه اوووووووووى
_________________

على فكرة يا كاتى احنا فى منتدى مسيحى مفيش مكان للحب والغرام العالمى الذائف لكن أحنا هنا بنتكلم على عناية وحب المسيح ويا رايت ميكونش كلامى زعلك وانا بشجعك أنك تكتبى قصص بس ع حب المسيح
_________________
jesus my lord

ااوكى شكرا ليكى يا كاتى على الموضوع
بس انا برضه عاجبنى رد كوكو مش معنى كده انه احنا مقفولين وكده بس
مظنش انه ده مكان قصص الحب لانه فى منتديات تانى
للشغل ده مش معنى كده انه احنا عايزين
قصص مسيحيه بحته بس انواع القصص التانيه
تكون ضحك وهزار وكده
اتمنى الرد ميزعلكيش يا توتا ولو عندك اى كلام عايزه تقوليه انا تحت امرك
_________________

لكن لو انتى تقصدى
بالقصه دى ضحك وهزار وده اللى
انا فهمته اول ما قريتها يبقى
احنا اسفين لو فهمنا غلط ويبقى بجد الموضوع
جميل وعموما ربنا يباركك فى كل حاجه
لانك بجد بركه كبيره للمنتدى
_________________

سورى ياجماعه انا اسفه وكلامكم مزعلنيش ولا حاجه احنا بخدم كلنا مع بعض اخوات فى عمل واحد واكيد هنعمل على بعض وانا بجد بتأسف للمره التانيه ســــــــــــــورى
_________________

انا الى أسف كاتى على اسلوبى كان وحش بس معاكى بس انا أسف ويمكن انا كان قصدى خوف على المنتدى مش اكتر واحنا كلنا أعضاء فى جسد واحدة ومنأدرش نقول لدة لا متعملش لكن بل بلعكس احنا كلناتحت امرك ويا رايت اسمع مشركات تانى منك ومن مواضيعك ألحلوة وأكيد فى اماكن تانى للمواضيع دى وهنا فى المنتدى مش برة وكلنا مع بعض عائلة أأأأأأسسسسسسف
_________________
jesus my lord

سورى يا جماعة الكلام الى أتكتب دة بأسم توتا كان كلامى معلش غلطة مطبعية
_________________
jesus my lord

لا ولا يهمك يا عم كوكو وربنا يبارككم يا جماعه على شغلكم فى المنتدى
_________________

الموضوع حلو اوى ربنا يباركك
_________________

يا جماعة انا رايى بيختلف شوية مع الشباب بس هى القصة حلوة لولا انها بدور حول غنوة واخوه اسمه حسن مكنش حد هايعترض عليها لانها فعلا مؤثرة للي يفهم

طبعا مقصدكيش انتى فيولا خالص

شكرا كاتى

_________________